"The best header in Cambodian player" នេះជាសំណេររបស់ចាន់ វឌ្ឍនាកា ដែលបានសរសេរលើគណនី Facebook របស់ខ្លួនស្ដីពីអតីតខ្សែប្រយុទ្ធ ឃួន ឡាបូរ៉ាវី។

សំណេរនេះមានន័យថា វឌ្ឍនាកា បានចាត់ទុកឃួន ឡាបូរ៉ាវី ជាអ្នកពូកែប្រើក្បាលបំផុតក្នុងចំណោមកីឡាករខ្មែរ ហើយគេបានសរសេរបន្ទាប់ពីការប្រកាសចូលនិវត្តន៍របស់រៀមច្បងខាងលើ។

គួរដឹងដែរថា បូរ៉ាវី បានប្រកាសចូលនិវត្តន៍កាលថ្ងៃព្រហស្បតិ៍ ទី០៩ ខែមករា ឆ្នាំ២០២០ពីអាជីពបាល់ទាត់។

កីឡាករមានប្រភពពីខេត្តកំពង់ចាមបានផ្ដើមអាជីពផ្លូវការនៅព្រះខ័នរាជស្វាយរៀង ដោយរួមចំណែកឈ្នះ MCL ឆ្នាំ២០១៣ និងពានសម្ដេចតេជោ ហ៊ុន សែន ឆ្នាំ២០១១ និង២០១២។

នៅរដូវកាល២០១៤ បូរ៉ាវី បានផ្លាស់ទៅបឹងកេត ជាទីរូបគេជួយឈ្នះពាន MCL ២០១៦ និង២០១៧ និងពានសម្ដេចតេជោ ហ៊ុន សែន ២០១៩។ គេក៏ធ្លាប់ឈ្នះស្បែកជើងមាសពានសម្ដេចតេជោ ៤លើកដែរនៅឆ្នាំ២០១១, ២០១២, ២០១៤ និង២០១៧។

ចប់ពីអាជីពបាល់ទាត់ អតីតខ្សែប្រយុទ្ធជម្រើសជាតិកម្ពុជារូបនេះបានទទួលការងារជាគ្រូយុវជនប្រចាំក្លិបបឹងកេត៕